जळगावात घुमला शिवगर्जनांचा जयघोष; जिजामाता माध्यमिक विद्यालयात शिवजयंती उत्साहात साजरी!

जळगाव: शहरानजीकच्या न्यू जागृती मित्र मंडळ संचलित जिजामाता माध्यमिक विद्यालय (हरी विठ्ठल नगर) येथे छत्रपती शिवाजी महाराज जयंती सोहळा मोठ्या उत्साहात पार पडला. या कार्यक्रमाच्या अध्यक्षस्थानी बापूसाहेब डी. एल. महाले होते, तर प्रमुख अतिथी म्हणून संस्थेचे सचिव सुरेशजी बागुल, छावा संघटनेचे जिल्हाध्यक्ष प्रमोद पाटील, मुख्याध्यापक राजेंद्र खोरखेडे आणि किशोर पाटील यांची उपस्थिती होती.

शिवरायांच्या कार्याची आठवण अन् पर्यावरण रक्षणाचा संदेश

कार्यक्रमाचे अध्यक्ष बापूसाहेब डी. एल. महाले यांनी आपल्या अध्यक्षीय भाषणात छत्रपती शिवाजी महाराजांच्या दूरदृष्टीचे आणि त्यांच्या जंगल संवर्धनाविषयीच्या कार्याचे महत्त्व अधोरेखित केले. आजच्या काळात पर्यावरणाचे रक्षण करणे किती आवश्यक आहे, हे पटवून देत त्यांनी सर्वांना पर्यावरण रक्षणाचे आवाहन केले. शिवरायांचे केवळ शौर्यच नव्हे, तर त्यांचे नैसर्गिक संपदेप्रती असलेले प्रेम आणि दूरदृष्टी हे आजच्या पिढीसाठी प्रेरणादायी असल्याचेही त्यांनी नमूद केले.

ढोल-ताशांच्या गजरात निघाली आकर्षक मिरवणूक

जयंती सोहळ्याचा अविभाज्य भाग म्हणून शाळेतून एका आकर्षक मिरवणुकीचे आयोजन करण्यात आले होते. या मिरवणुकीत इयत्ता सातवीचा विद्यार्थी प्रेम सोनवणे याने शिवाजी महाराज आणि चैताली वाडीले हिने राजमाता जिजाऊ यांची वेशभूषा साकारली होती, जी सर्वांचे लक्ष वेधून घेत होती. २३५ विद्यार्थी ढोल-ताशांच्या गजरात या मिरवणुकीत सहभागी झाले होते. श्रीधर नगर, बाजार चौक आणि नवरंग कॉलनी परिसर 'जय भवानी, जय शिवाजी' च्या घोषणांनी आणि ढोल-ताशांच्या निनादाने शिवमय झाला होता.

सामाजिक कार्यकर्ते धनराज हिवराळे यांच्यातर्फे मिरवणुकीत सहभागी विद्यार्थ्यांना खाऊचे वाटप करण्यात आले. कार्यक्रमाचे सूत्रसंचालन किशोर पाटील यांनी केले, तर दिनेश सोनवणे यांनी उपस्थितांचे आभार मानले. हा सोहळा यशस्वी करण्यासाठी शाळेतील सर्व शिक्षक आणि शिक्षकेतर कर्मचाऱ्यांनी विशेष परिश्रम घेतले.

लोकमन न्यूजसाठी रिपोर्टर: अनिल चौधरी, निंब