धानोरा: महाविष्णू यज्ञाचे राणेंना निमंत्रण; मनसेच्या सदस्य नोंदणीला वेग

(लोकमन न्यूज: अनिल चौधरी, निंब)जळगाव: चोपडा तालुक्यातील धानोरा येथे आगामी काळात आयोजित करण्यात आलेल्या भव्य चतुर्विध महोत्सव महाविष्णू यज्ञ याग सोहळ्याच्या पार्श्वभूमीवर महाराष्ट्र नवनिर्माण सेनेचे जळगाव जिल्हा संपर्क अध्यक्ष व कामगार सेना सरचिटणीस गजानन राणे यांनी सदिच्छा भेट दिली. आपल्या रावेर लोकसभा दौऱ्यादरम्यान त्यांनी धानोरा गावाला भेट देऊन मंदिर विश्वस्त मंडळाशी चर्चा केली, तसेच गावातील तरुणांना मनसेच्या सदस्य नोंदणीत मोठ्या संख्येने सहभागी होण्याचे आवाहन केले.

भव्य सोहळ्याची तयारी आणि राणेंची उपस्थिती

धानोरा येथे येत्या ९ ते १४ एप्रिल दरम्यान भव्य चतुर्विध महोत्सव आणि महाविष्णू यज्ञ याग सोहळ्याचे आयोजन करण्यात आले आहे. या धार्मिक सोहळ्याची तयारी सध्या वेगात सुरू असून, परिसरातील भाविकांमध्ये उत्साहाचे वातावरण आहे. रावेर लोकसभा मतदारसंघाच्या दौऱ्यावर असताना गजानन राणे यांनी आवर्जून या ठिकाणी भेट दिली. यावेळी त्यांनी यज्ञ स्थळाची पाहणी करत मंदिर विश्वस्त मंडळाशी सविस्तर चर्चा केली. याप्रसंगी कार्यक्रमाच्या आयोजन समितीकडून गजानन राणे यांना या महासोहळ्याची निमंत्रण पत्रिका देऊन सन्मानित करण्यात आले.

मनसेच्या सदस्य नोंदणीवर भर आणि युवा संवाद

या सदिच्छा भेटीदरम्यान गजानन राणे यांनी धानोरा गावातील तरुणांशी थेट संवाद साधला. महाराष्ट्र नवनिर्माण सेनेची सध्या सुरू असलेली सदस्य नोंदणी मोहीम पक्षाच्या भविष्याच्या दृष्टीने अत्यंत महत्त्वाची असून, गावातील जास्तीत जास्त तरुणांनी या मोहिमेत सहभागी होऊन पक्षबांधणीसाठी पुढाकार घ्यावा, असे आवाहन त्यांनी केले. याप्रसंगी मनसेचे जिल्हाध्यक्ष ॲड. जमील देशपांडे यांनीही उपस्थित तरुणांना व कार्यकर्त्यांना पक्षाच्या ध्येयधोरणांबाबत सविस्तर मार्गदर्शन केले.

या महत्त्वपूर्ण भेटीप्रसंगी मनसेचे लोकसभा जिल्हाध्यक्ष कल्पेश पवार, किरण तळेले, कल्पेश खैरनार, ग्रामपंचायत सदस्या लीला विशाल महाजन, विशाल महाजन, विष्णू कोळी, चैतन्य महाजन, महेंद्र पाटील यांच्यासह धानोरा गावातील असंख्य नागरिक आणि तरुण कार्यकर्ते मोठ्या संख्येने उपस्थित होते.