राज्यात हवामानाचा लहरीपणा: कुठे दमदार पाऊस, कुठे वाढणार उन्हाचा चटका; शेतकऱ्यांनो काळजी घ्या!

( लोकमन न्यूज: अनिल चौधरी, निंब) अमळनेर: राज्यात यंदा २०२६ मध्ये दुष्काळी परिस्थिती राहील, अशा चर्चा काही दिवसांपासून ऐकायला मिळत होत्या. मात्र, मार्च आणि एप्रिल महिन्यांनी सर्वांनाच आश्चर्याचा धक्का दिला आहे. राज्याच्या अनेक भागांत तुफान पाऊस झाला असून, काही ठिकाणी तर विहिरी भरतील इतका दमदार पाऊस झाला आहे. या अचानक आलेल्या अवकाळी पावसामुळे शेती आणि जनजीवन दोन्ही प्रभावित झाले आहे.

अवकाळी पावसाचे कारण: जागतिक तापमानवाढ आणि हवेच्या पोकळ्या

हवामान अभ्यासकांनी या अवकाळी पावसामागची कारणमीमांसा केली आहे. त्यांच्या मते, जागतिक तापमानवाढीमुळे निर्माण झालेल्या हवेच्या पोकळ्या आणि पश्चिमेकडून येणारे कोरडे वारे यामुळे हा अवकाळी पाऊस पडत आहे. हवेचे जोड क्षेत्र सध्या मध्य महाराष्ट्रामध्ये अमरावती, अकोला, जालना, छत्रपती संभाजीनगर, अहिल्यानगर आणि पुणे या भागावर स्थिर आहे.

आज या भागांत पश्चिमेचे कोरडे वारे व दक्षिणेकडून येणारे बाष्पयुक्त वारे एकत्र आल्यामुळे मोठ्या प्रमाणात दव आणि धुके बघायला मिळाले. दुपारनंतर या भागांत पावसाचा जोरदार पट्टा (बेल्ट) निर्माण होऊन तो हळूहळू पूर्वेला मराठवाडा विभागाकडे सरकत जाईल असा अंदाज आहे.

आजचे हवामान: मराठवाडा, उत्तर महाराष्ट्रात पावसाचा जोर

आजपासून हळूहळू पावसाची तीव्रता कमी होण्यास सुरुवात होईल. मराठवाड्यात आज पावसाचा जोर कायम राहील, तर उत्तर महाराष्ट्रात नाशिक, धुळे आणि नंदुरबारच्या काही भागांत मध्यम ते जोरदार वादळी पावसाची शक्यता आहे. तसेच, पश्चिम महाराष्ट्रामध्ये देखील आज आणि उद्या काही भागात पाऊस हजेरी लावेल.

५ एप्रिलनंतर उन्हाचा चटका वाढणार, एप्रिल अखेरीस पुन्हा अवकाळीचा इशारा

येत्या ५ आणि ६ एप्रिल रोजी राज्यातील पावसाळी वातावरण पूर्णपणे निवळेल, त्यानंतर उन्हाच्या झळा तीव्र होतील. १० एप्रिलनंतर उत्तर महाराष्ट्रातील धुळे, जळगाव, नंदुरबार तसेच मराठवाडा आणि विदर्भ या भागांत तापमानाचा पारा ३८ ते ४० अंश सेल्सिअसपर्यंत पोहोचण्याचा अंदाज आहे. मध्य महाराष्ट्रामध्ये नाशिक, अहिल्यानगर आणि पुणे परिसरातील तापमान ३६ ते ३७ अंशांच्या आसपास राहील.

मात्र, हवामानाचा लहरीपणा इथेच थांबणार नाही. राज्यात १० ते २० एप्रिल या काळात पश्चिम महाराष्ट्रातील कोल्हापूर, सांगली, सिंधुदुर्ग या भागांत पुन्हा अवकाळी पावसाची शक्यता वर्तवण्यात आली आहे. एप्रिल महिन्याच्या शेवटी देखील अशाच हवेच्या पोकळ्या तीव्र होतील आणि राज्याच्या अंतर्गत भागात म्हणजेच मध्य महाराष्ट्र आणि मराठवाडा विभागात पुन्हा पावसाचा जोर वाढण्याची शक्यता आहे.

त्यामुळे, शेतकऱ्यांनी आणि नागरिकांनी हवामानाच्या या बदलत्या अंदाजानुसार आपल्या कामाचे नियोजन करावे आणि योग्य ती खबरदारी घ्यावी, असे आवाहन करण्यात आले आहे.

- वृत्त संकलन: पंकज पाटील, अमळनेर