जळगावात 'साहित्य अकादमी' पुरस्कार विजेते राजू बाविस्कर यांचा भव्य गौरव सोहळा!

लोकमन न्यूज, जळगाव: सुप्रसिद्ध चित्रकार आणि साहित्यिक राजू बाविस्कर यांच्या साहित्य क्षेत्रातील योगदानाला मिळालेल्या प्रतिष्ठित सन्मानाबद्दल त्यांचा जळगाव येथे विशेष गौरव करण्यात आला.

हा गौरव सोहळा अण्णासाहेब सुपडू सुतार फाउंडेशनतर्फे आयोजित करण्यात आला होता. सेवानिवृत्त शिक्षणाधिकारी वाय. एन. ठोसरे यांच्या हस्ते बाविस्कर यांचा शाल व पुष्पगुच्छ देऊन सन्मान करण्यात आला. कार्यक्रमाचे यशस्वी आयोजन फाउंडेशनचे सचिव विजय लुल्हे यांनी केले होते.

याप्रसंगी उपस्थित मान्यवरांनी राजू बाविस्कर यांच्या 'काळ्या निळ्या रेषा' या आत्मकथनातील त्यांच्या संघर्षमय जीवनप्रवासाचे, तसेच चित्रकला आणि साहित्य क्षेत्रातील त्यांच्या अमूल्य योगदानाचे मनःपूर्वक कौतुक केले. त्यांच्या लेखनाने वाचकांना त्यांच्या अंतरंगात डोकावण्याची संधी दिली असल्याचे अनेकांनी नमूद केले.

भावनिक वातावरणात जुन्या आठवणींना उजाळा

गौरव सोहळ्यात स्वातंत्र्यवीर सावरकर मित्रमेळ्याचे संस्थापक संजय भावसार यांनीही राजू बाविस्कर यांचा विशेष सत्कार केला. यावेळी जुन्या आठवणींना उजाळा मिळाल्याने वातावरण अधिकच भावूक झाले होते. अनेक उपस्थित मान्यवरांच्या डोळ्यात आनंदाश्रू तरळले.

या गौरवशाली कार्यक्रमाला अशोक कोतवाल, श्यामकांत वर्डीकर, सुनील दाभाडे यांसारखे अनेक साहित्यिक आणि जिल्ह्यातील अनेक मान्यवर उपस्थित होते.

(लेखन प्रतिनिधी: भवरे सर)