हीच का प्रशासनाची मराठी? भुसावळातील 'बहिणाबाई विक्री केंद्र' पाटीचा फोटो चर्चेत!

भुसावळ (प्रतिनिधी लोकमन न्यूज, निंब): एकीकडे संपूर्ण महाराष्ट्र राज्यभर मराठी भाषेला मिळालेल्या 'अभिजात' दर्जाचा उत्सव मोठ्या उत्साहात साजरा केला जात असताना, दुसरीकडे प्रशासकीय अधिकाऱ्यांना साध्या मराठी शब्दांचे आणि वाक्यांचे अर्थही समजत नसल्याचा धक्कादायक प्रकार भुसावळ शहरात उघडकीस आला आहे. महिला व बालकल्याण विभागांतर्गत महिला बचत गटांसाठी उभारलेल्या वास्तूला 'बहिणाबाई विक्री केंद्र' असे अपुरे आणि संभ्रम निर्माण करणारे नाव दिल्याने शहरात मोठा वाद निर्माण झाला आहे. नुकतेच या वास्तूच्या पाटीचे छायाचित्र समोर आले असून, यातून प्रशासनाचा हलगर्जीपणा स्पष्टपणे उघड होत आहे. या चुकीच्या नामकरणावर भुसावळचे प्रा. डॉ. जतीन मेढे यांनी तीव्र आक्षेप नोंदवला असून नावात तात्काळ बदल करण्याची मागणी केली आहे.

छायाचित्राने उघड केली प्रशासनाची गंभीर चूक

भुसावळ शहरात जुन्या प्रांत कार्यालयाच्या जागेवर शासनाच्या निधीतून एक नवी वास्तू उभी राहिली आहे. बचत गटाच्या चळवळीस गती मिळून ग्रामीण आणि शहरी भागातील महिलांचे आर्थिक सक्षमीकरण व्हावे, हा यामागील मुख्य उद्देश आहे. मात्र, वास्तूचे काम पूर्णत्वास येत असतानाच प्रशासनाने त्यावर 'प्रशिक्षण केंद्र' आणि मुख्य प्रवेशद्वारावर 'बहिणाबाई विक्री केंद्र' अशी पाटी लावली आहे. समोर आलेल्या छायाचित्रामुळे या नावातील त्रुटी आणि प्रशासनाचा गाफीलपणा चव्हाट्यावर आला आहे.

कवयित्री की संत? नावातील संभ्रम आणि भाषिक अज्ञान

या नामकरणावर परखड भाष्य करताना प्रा. डॉ. जतीन मेढे यांनी प्रशासनाला काही खडे सवाल विचारले आहेत. ते म्हणाले की, या वास्तूला 'बहिणाबाई' नाव दिले आहे, पण यातून नेमका कुणाचा बोध घ्यायचा? खानदेशातील प्रसिद्ध कवयित्री बहिणाबाई चौधरी की वारकरी संप्रदायातील संत बहिणाबाई? की अन्य कुणी? याचा कोणताही स्पष्ट अर्थ या पाटीवरून निघत नाही. प्रशासनाने एवढा साधा विचारही का करू नये? असा सवाल त्यांनी उपस्थित केला.

ही वास्तू महिला बचत गटांनी बनवलेल्या साहित्याच्या विक्रीसाठी उभारण्यात आली आहे. मात्र, 'बहिणाबाई विक्री केंद्र' या पाटीवरून तसा कोणताही अर्थ ध्वनित होत नाही. उलट यातून अत्यंत चुकीचा संदेश समाजात जाऊ शकतो. आपली व राज्याची मातृभाषा मराठी असताना शासन-प्रशासनातील लोकांना शब्दांचे आणि वाक्यांचे अर्थ नीट कळतात का? असा संतप्त सवाल डॉ. मेढे यांनी उपस्थित केला आहे. केवळ भाषेच्या प्रेमाचे वांझोटे ढोल वाजवण्यात काय अर्थ, अशी टीकाही त्यांनी केली आहे.

सदर नावात चुकीचा अर्थ दडलेला असून, प्रशासनाच्या या हलगर्जीपणावर डॉ. जतीन मेढे यांनी पुन्हा एकदा तीव्र नाराजी व्यक्त केली आहे. मराठी भाषेचा सन्मान जपण्यासाठी आणि प्रशासकीय कामकाजात सुस्पष्टता आणण्यासाठी या नामकरणाची तात्काळ दुरुस्ती होणे अत्यंत गरजेचे आहे. 'लोकमन न्यूज'च्या प्रतिनिधीने या प्रकरणी प्रशासकीय अधिकाऱ्यांशी संपर्क साधण्याचा प्रयत्न केला असता, त्यांच्याकडून अद्याप प्रतिसाद मिळालेला नाही.

(वृत्त संकलन: भवरे सर, पत्रकार)