इंग्रजी माध्यमाचा हव्यास धरणाऱ्यांना झणझणीत अंजन;मराठी शाळेतील भिकन रोजेकर यांची UPSC त गरुडझेप.

"कोण म्हणते होणार नाही, केल्या शिवाय राहणार नाही!" या उक्तीची प्रचिती जालना जिल्ह्यातील भोकरदन तालुक्यातील जळगाव सपकाळ येथील भूमिपुत्र भिकन जगन रोजेकर यांनी आणून दिली आहे. अत्यंत हलाखीच्या आणि प्रतिकूल परिस्थितीवर मात करत त्यांनी UPSC-२०२५ च्या परीक्षेत ८१३ वी रँक मिळवून ऐतिहासिक यश संपादन केले आहे. त्यांचा हा यशोप्रवास केवळ गरिबीवर मात करणारा नाही, तर इंग्रजी माध्यमाच्या खोट्या प्रतिष्ठेमागे धावणाऱ्या आजच्या समाजाला वास्तवाची जाणीव करून देणारा आहे.

सध्याच्या काळात आधुनिकता, फॅशन आणि एकमेकांतील चढाओढीच्या तीव्र स्पर्धेपायी लाखो रुपयांची उधळण करून लहान मुलांना इंग्रजी माध्यमात दाखल करण्याचे पेव फुटले आहे. या नादात मुलांचे निरागस बालपण आणि आनंद हिरवून घेणाऱ्या 'आधुनिक मम्मी-पप्पांच्या' डोळ्यांत झणझणीत अंजन घालणारे हे उदाहरण आहे. अकरावीत असताना इंग्रजीतील 'Nature' या शब्दाचा उच्चार 'नटुरे' आणि 'Judge' या शब्दाचा उच्चार 'जुडगे' असा करणाऱ्या, संपूर्ण शिक्षण मराठी प्राथमिक आणि माध्यमिक शाळेत घेतलेल्या भिकन यांनी थेट देशातील सर्वोच्च आणि कठीण समजल्या जाणाऱ्या UPSC परीक्षेत घवघवीत यश मिळवले आहे.

अत्यंत हलाखीची कौटुंबिक पार्श्वभूमी

भिकन यांची कौटुंबिक पार्श्वभूमी अत्यंत गरिबीची आहे. त्यांचे वडील जगन रोजेकर हे दुसऱ्याच्या शेतात सालगडी (शेतमजूर) म्हणून काम करतात, तर आई बेबीताई याही कुटुंबाला हातभार लावण्यासाठी शेतमजुरी करतात. त्यांचे घर आजही साध्या पत्र्याचे आहे. आई-वडिलांनी स्वतः शिक्षण घेतले नसले, तरी मुलांच्या शिक्षणासाठी त्यांनी कष्टाची कोणतीही तमा बाळगली नाही. दुर्दैवाची बाब म्हणजे, भिकन यांच्या अभ्यासाच्या काळातच एका दुर्घटनेत त्यांच्या आईला अपंगत्व आले. अशा खचवून टाकणाऱ्या परिस्थितीतही भिकन यांनी आपली जिद्द सोडली नाही आणि अभ्यासावरील लक्ष विचलित होऊ दिले नाही.

संघर्षमय शिक्षणाचा प्रवास

भिकन यांचे प्राथमिक आणि माध्यमिक शिक्षण गावातीलच विनय विद्यालयातून पूर्ण झाले. त्यानंतर छत्रपती संभाजीनगर (औरंगाबाद) येथील विवेकानंद महाविद्यालयातून त्यांनी कृषी विषयात पदवी पूर्ण केली. हा त्यांचा स्पर्धा परीक्षांसाठी 'प्लॅन बी' होता. पदवी पूर्ण झाल्यानंतर त्यांनी थेट दिल्ली गाठली आणि यूपीएससीची तयारी सुरू केली.

चार अपयशानंतर पाचव्या प्रयत्नात यश

या प्रवासात त्यांना सलग चार वेळा अपयशाचा सामना करावा लागला. अनेकदा अपयश आल्यावर तरुण निराश होतात, मात्र भिकन यांनी हार मानली नाही. त्यांनी अधिक जिद्दीने पाचवा प्रयत्न केला आणि त्यात ८१३ वी रँक मिळवून यशाला गवसणी घातली. या यशानंतर त्यांना IPS (भारतीय पोलीस सेवा) कॅडर मिळण्याची दाट शक्यता वर्तवली जात आहे.

एकाच घरातील दोन सुपुत्र देशसेवेत!

रोजेकर कुटुंबासाठी ही दुहेरी अभिमानाची बाब आहे. भिकन यांचा लहान भाऊ विकास रोजेकर हा देखील नुकताच भारतीय सैन्यात दाखल झाला आहे. सालगडी म्हणून आयुष्यभर राबणाऱ्या एका सामान्य पित्याची दोन्ही मुले आता थेट देशसेवेत रुजू होत आहेत. जिद्द आणि मेहनतीच्या बळावर कोणत्याही परिस्थितीला शरण न जाता यशाचे शिखर कसे गाठता येते, याचा आदर्श रोजेकर बंधूंनी संपूर्ण तरुण पिढीसमोर ठेवला आहे.