अमळनेरकरांच्या आरोग्याशी खेळ! शहरात डासांचा भयंकर त्रास, प्रशासन मात्र सुस्त.

अमळनेर (लोकमन न्यूज प्रतिनिधी - अनिल चौधरी, निंब) : अमळनेर शहरात सध्या डासांचा उपद्रव इतका वाढला आहे की, सामान्य नागरिकांचे दैनंदिन जगणे असह्य झाले आहे. एकीकडे उन्हाची तीव्रता वाढत असताना, दुसरीकडे डासांच्या वाढत्या प्रादुर्भावामुळे डेंग्यू आणि मलेरियासारख्या साथीच्या आजारांची मोठी भीती शहरात निर्माण झाली आहे. मात्र, नागरिकांच्या आरोग्याशी निगडित या अत्यंत गंभीर समस्येकडे नगरपालिकेचे पूर्णपणे दुर्लक्ष होत असल्याने, 'शहरातील नागरिकांचे पालकत्व स्वीकारेल कोण?' असा संतप्त सवाल आता अमळनेरकरांकडून विचारला जात आहे.

मोकळ्या जागांवरून थेट घरात शिरकाव; लहान मुलांची झोप उडाली

शहरातील अनेक सार्वजनिक ठिकाणी आणि कॉलनी परिसरातील मोकळ्या जागांवर (ओपन स्पेस) डासांची उत्पत्ती मोठ्या प्रमाणावर होत असल्याचे निदर्शनास आले आहे. सकाळी, सायंकाळी आणि विशेषतः रात्रीच्या वेळी या डासांचा भयंकर त्रास नागरिकांना सहन करावा लागत आहे. बाहेर मोकळ्या जागेत मोठ्या प्रमाणावर असलेले डास आता थेट घरांमध्ये शिरत असल्याने नागरिकांची आणि विशेषतः लहान मुलांची झोप उडाली आहे. त्यांच्या आरोग्याला गंभीर धोका निर्माण झाला आहे.

राजकीय कलगीतुऱ्यात सामान्य नागरिकांची होरपळ

डासांवर नियंत्रण मिळवण्यासाठी नगरपालिकेकडून शहरात तातडीने फॉगिंग मशीन फिरवणे किंवा कीटकनाशक फवारणी करणे अपेक्षित आहे. मात्र, संपूर्ण शहरात कुठेही फवारणी होताना दिसत नाही. शहरातील सत्ताधारी आणि विरोधक केवळ आपापसातील राजकीय कलगीतुऱ्यात मग्न असून, यामध्ये सामान्य नागरिकांची मात्र नाहक होरपळ होत आहे. नागरिकांचे प्रतिनिधी म्हणून मिरवणाऱ्या धुरीणांच्या लक्षात ही बाब आणून देऊनही, उपाययोजना शून्य असल्याने नागरिकांमध्ये तीव्र नाराजी पसरली आहे.

डी. ए. धनगर यांची युद्धपातळीवर उपाययोजनांची मागणी

शहरातील या विदारक परिस्थितीवर सामाजिक कार्यकर्ते आणि शिक्षकी पेशातील आदर्श, अभ्यासू व धडपडे नेतृत्व म्हणून ओळखले जाणारे श्री. डी. ए. धनगर यांनी तीव्र चिंता व्यक्त केली आहे. लोकहितासाठी डासांवर नियंत्रण आणण्यासाठी नगरपालिकेकडून युद्धपातळीवर उपाययोजना होणे गरजेचे आहे. नगरपालिकेने तातडीने शहरात डास प्रतिबंधक फवारणी करावी, अन्यथा सामान्य नागरिकांचे आरोग्य धोक्यात आल्याशिवाय राहणार नाही, असा इशारा त्यांनी दिला.

साथीच्या आजारांचा उद्रेक होण्यापूर्वीच प्रशासनाने वेळीच जागे होऊन धूर फवारणी करावी आणि अमळनेरकरांना या जीवघेण्या त्रासातून दिलासा द्यावा, अशी जोरदार मागणी आता संपूर्ण शहरातून जोर धरत आहे.