नाशिकमध्ये महिलांच्या लैंगिक शोषण प्रकरणी तथाकथित ज्योतिषी कॅप्टन अशोक खरात याला अटक. सुशिक्षित आणि प्रतिष्ठित व्यक्तींनाही भोंदूगिरीच्या जाळ्यात ओढणारी धक्कादायक घटना, समाजात वाढत्या मानसिक गुलामगिरीचे दर्शन.
नाशिक: "नको नको रे ज्योतिषा, माझ्या दारी नको येऊ..." असे ठणकावून सांगणाऱ्या थोर कवयित्री बहिणाबाई चौधरी यांच्या महाराष्ट्रात आज एक दुर्दैवी चित्र पाहायला मिळत आहे. नाशिक येथील तथाकथित ज्योतिषी कॅप्टन अशोक खरात याला महिलांच्या लैंगिक शोषण प्रकरणात झालेली अटक, ही केवळ एका गुन्हेगाराची अटक नसून, आपल्या समाजातील `मानसिक गुलामगिरी`चे आणि `अंधश्रद्धे`चे भयावह `दर्शन` घडवणारी घटना आहे.
भोंदूचा बाजार: सुशिक्षितांची मांदियाळी कशासाठी?
सर्वात धक्कादायक बाब म्हणजे, कॅप्टन अशोक खरात याच्या नाशिकमधील आश्रम आणि मंदिरात जाणाऱ्यांमध्ये सामान्य माणसांपेक्षा सुशिक्षित, प्रतिष्ठित आणि मान्यवर मंडळींचा भरणा अधिक होता. "दुनिया झुकती है, झुकानेवाला चाहिए" या उक्तीप्रमाणे हा भोंदू ज्योतिषी समाजातील उच्चभ्रू वर्गाला आपल्या जाळ्यात ओढण्यात यशस्वी ठरला होता, हे चिंताजनक आहे.
बहिणाबाईंचा सणसणीत टोला आणि आजची विस्मृती
अडाणी असूनही ज्यांच्याकडे अद्भुत प्रतिभा आणि समाजभान होते, अशा बहिणाबाईंनी ज्योतिष्याला दारातून हाकलले होते. त्यांनी स्पष्ट म्हटले होते की, "माझे दैव मला कळे, माझा हात नको पाहू". तळहाताच्या रेघोट्यांवर नशीब शोधणाऱ्यांना त्यांनी "बापा नको मारू थापा" म्हणत सणसणीत चपराक लगावली होती. मात्र, आजच्या पदवीधरांना या विचारांचा विसर पडल्यानेच खरातसारखी माणसे समाजात फोफावत आहेत.
राजर्षी शाहू महाराजांचा ऐतिहासिक धडा
राजर्षी शाहू महाराजांनी त्यांच्या दरबारात आलेल्या `ज्योतिष्या`ला दोन दिवसांनी काय होणार, असे विचारले होते. जेव्हा त्याने 'माहीत नाही' असे सांगितले, तेव्हा महाराजांनी त्याला 'चाबकाचे फटके' बसणार असल्याचे सांगून `ज्योतिष्याचा खोटारडेपणा उघड` केला होता. संतांच्या आणि समाजसुधारकांच्या या परंपरेचा विसर पडल्यानेच आज अनेक जण आपले `आयुष्य बरबाद` करून घेत आहेत, ही वस्तुस्थिती आहे.
कर्तव्य हाच खरा धर्म: विवेकाची गरज
भगवद्गीतेत सांगितल्याप्रमाणे, मनुष्याने आपले कर्तव्य प्रामाणिकपणे पार पाडले पाहिजे. `देव` आणि `धर्म` हे `वैयक्तिक श्रद्धेचे` विषय असावेत, पण कर्मकांडाच्या नावाखाली होणारे शोषण थांबणे गरजेचे आहे. जर आपण विवेकाने वागलो नाही, तर अशा भोंदूंच्या रूपाने `समाज` अधिक अधोगतीकडे जाईल, असा इशारा या `घटनेतून` मिळत आहे.
लेखन प्रतिनिधी: श्री. सुगनचंद (नाना) पाटील
संपादन: लोकमन न्यूज नेटवर्क.
