कोकणवासीयांच्या आदरातिथ्याने खान्देशी मनं भारावली! नागोठणे ते श्रीवर्धनच्या अविस्मरणीय सफरीच्या खास आठवणी

(लोकमन न्यूज प्रतिनिधी - अनिल चौधरी, निंब, अमळनेर)

नागोठणे : निसर्गाचे वरदान लाभलेल्या कोकणातील सौंदर्य जितके विलोभनीय आहे, तितकीच तिथल्या माणसांची मनेही विशाल आहेत. नुकताच २० मार्च २०२६ रोजी 'पोपटी' आणि पत्रकार परिषदेच्या निमित्ताने नागोठणे आणि श्रीवर्धनचा दौरा करण्याचा योग आला. या दौऱ्यात कोकणवासीयांनी आणि तिथे स्थायिक झालेल्या आपल्या खान्देशी बांधवांनी केलेल्या आदरातिथ्याने आम्हा सर्वांची मने जिंकली असून, या सफरीच्या अविस्मरणीय आठवणी कायम स्मरणात राहतील.

नेरपागर कुटुंबाचा हसतमुख पाहुणचार आणि मनसोक्त भोजन

कोकणात जरी खान्देशी लोक राहत असले तरी त्यांच्या स्वागताची तऱ्हा काही वेगळीच असते, याचा प्रत्यय या दौऱ्यात सुरुवातीलाच आला. नेरपागर कुटुंबाने दिलेली वागणूक अत्यंत हृदयस्पर्शी होती. सौ. हेमलता वहिनी यांनी कितीही पाहुणे आले तरी कपाळावर कुठलीही आढी न आणता, न कंटाळता हसतमुखाने सर्वांचे स्वागत केले. खमंग कोकणी पद्धतीचा स्वयंपाक त्यांनी आवडीने खाऊ घातला. आमची सोनी ताई हिने स्पेशल 'चौधरी' पद्धतीचे जेवण बनवले, तर आमचे लाडके जावई कोकळे सर यांनी भोजनाच्या वेळी स्वतः जातीने लक्ष घालून उत्तम नियोजन केले. आणि हो आमचा लहानसा, नन्नासा, गोंडस बिट्टू सर्वांचे आकर्षणाचे केंद्र बिंदू होता.

'नारळासारखे' व्यक्तिमत्व: मित्र श्याम आबांची अनोखी साथ

या संपूर्ण प्रवासात आमचे मित्र श्याम आबा यांची साथ म्हणजे एक पर्वणीच होती. आपली सर्व कामे बाजूला ठेवून आणि खर्चाची कुठलीही पर्वा न करता ते सोबत राहिले. पत्रकार संघाचे ३० वर्षांपासून ते संस्थापक आहेत. त्यांचे अप्रतिम लेखन, अभ्यासू मांडणी आणि तोलून-मापून बोलण्याचे कौशल्य वाखाणण्याजोगे आहे. स्वभाव वरून रागीट पण तितकाच प्रेमळ... शब्दांच्या बाणांनी प्रथम घायाळ करायचे आणि लगेचच स्वतः मलमपट्टी करायची, असा त्यांचा जणू 'नारळासारखा' (बाहेरून कडक आणि आतून गोड) स्वभाव आहे. 'जो बोलेंगे वह मुख पर' असे हे दिलखुलास आणि हसतमुख व्यक्तिमत्व या दौऱ्याचे खास आकर्षण ठरले.

श्रीवर्धनच्या किनाऱ्यावर नंदनवनाचा भास: पत्रकार भारत सरांचे आदरातिथ्य

नागोठणे येथील कार्यक्रमानंतर आमचा प्रवास श्रीवर्धनकडे वळला. तिथे आमची भेट एका हसतमुख, आदर्श आणि अभ्यासू व्यक्तिमत्त्वाशी झाली; ते म्हणजे पत्रकार भारत सर. समुद्रकिनाऱ्यावर मच्छीचा व्यापार करणारे भारत सर यांचे निसर्गरम्य किनाऱ्यावर स्वतःचे रेस्ट हाऊस आहे. तिथे त्यांनी दिलेला सुंदर नाश्ता, चहा आणि भोजनाची मेजवानी पाहता साक्षात नंदनवनात आल्याचा भास झाला.

बालमित्रांची सोबत आणि स्थानिक पत्रकारांचा स्नेह

या मेजवानीचा आणि कोकण सफरीचा खरा आनंद माझे बालमित्र विष्णू आबा, श्याम आबा, किशोर, अनिल आणि कैलास यांच्या सोबत लुटता आला. तसेच कोकणातील पत्रकारांशी झालेली भेटही तितकीच गोड आणि संस्मरणीय ठरली. ॲड. महेश सर, अनिल सर आणि जोशी सर या स्थानिक पत्रकारांनीही मोठा जिव्हाळा दाखवला.

पोपटी आणि पत्रकार परिषदेच्या निमित्ताने नागोठणे आणि श्रीवर्धनसारख्या सुंदर ठिकाणी जाण्याचा हा योग केवळ निसर्गसौंदर्यामुळेच नव्हे, तर तिथल्या माणसांच्या प्रेमामुळे आनंददायक ठरला. धन्य ते कोकणवासी आणि त्यांच्या आदरातिथ्याची व पाहुणचाराची तऱ्हा खरोखरच न्यारी!