ज्ञानराज प्रतिष्ठान व स्वरांजली गृपचा स्तुत्य उपक्रम; 'भावसरगम' कार्यक्रमात रसिक श्रोते मंत्रमुग्ध

अमळनेर (प्रतिनिधी लोकमन न्यूज): गुढीपाडव्याच्या शुभमुहूर्तावर अमळनेर शहरात आयोजित केलेल्या 'भावसरगम' या संगीतमय कार्यक्रमाला रसिक प्रेक्षकांचा उदंड प्रतिसाद लाभला. ज्ञानराज प्रतिष्ठान आणि स्वरांजली ग्रुप यांच्या संयुक्त विद्यमाने जुना टाऊन हॉल येथील टिळक मंदिरात गुरुवारी (दि. १९ मार्च) सायंकाळी हा बहारदार कार्यक्रम पार पडला. स्थानिक कलाकारांनी सादर केलेल्या मराठी भावगीतांनी उपस्थितांना अक्षरशः मंत्रमुग्ध केले.

या सुमधुर मैफिलीचे आयोजन ज्ञानराज प्रतिष्ठानचे अध्यक्ष प्रा. डॉ. प्रभाकर ज. जोशी आणि स्वरांजली ग्रुपचे प्रमुख श्री. किशोर देशपांडे यांच्या मार्गदर्शनाखाली करण्यात आले होते. वाद्यवृंदाच्या उत्तम साथीने स्वरांजली ग्रुपच्या सर्व स्थानिक कलाकारांनी एकापेक्षा एक सरस भावगीते सादर करून गुढीपाडव्याचा आनंद द्विगुणित केला.

'भावसरगम' मध्ये सुरांची बरसात

या सुरेल मैफिलीत अनेक नामवंत कलाकारांनी आपली कला सादर केली. डॉ. गौरव मुठे यांनी 'अविरत ओठी व्हावे नाम', सौ. युगछाया शिंगाणे यांनी 'विकत घेतला शाम', सौ. विद्या पाटील यांनी 'सख्यारे घायाळ मी हरिणी', श्री. प्रदीप शिंगाणे यांनी 'भातुकलीच्या खेळामधली राजा आणि राणी', सौ. नेहा देशपांडे यांनी 'साधी भोळी मिरा तुला' तर सौ. पूनम अग्रवाल यांनी 'अखेरचा हा तुला दंडवत' ही अजरामर भावगीते सादर केली. याव्यतिरिक्त इतरही अनेक सुमधुर गीतांची मेजवानी रसिकांना देण्यात आली, ज्याला अमळनेरच्या रसिक प्रेक्षकांनी टाळ्यांच्या गजरात भरभरून दाद दिली.

उत्कृष्ट साथसंगत आणि यशस्वी संयोजन

या सांगीतिक कार्यक्रमाला हार्मोनियमवर श्री. किशोर देशपांडे यांनी तर तबला आणि ढोलकीवर देवांना गुरव यांनी उत्कृष्ट साथसंगत केली. कार्यक्रमाचे अत्यंत ओघवत्या शैलीत सूत्रसंचालन सौ. पूजा शहा यांनी केले, तर ध्वनी व्यवस्थेची (साऊंड) जबाबदारी श्री. धनराज पवार यांनी उत्तमरीत्या पार पाडली.

हा कार्यक्रम पूर्णपणे मराठी भावगीतांवर आधारित असल्याने तो रसिक प्रेक्षकांच्या अंतर्मनात घर करून गेला. अमळनेरच्या स्थानिक कलाकारांनी सादर केलेल्या या दर्जेदार कलाकृतीमुळे उपस्थितांना एक निखळ आनंद मिळाला असून, शहरात या कार्यक्रमाचे विशेष कौतुक होत आहे.