बाळाचे पाय पाळण्यात दिसतात! निंबच्या ९ वर्षीय केदारेश्वरची पखवाजावर लक्षवेधी जादू

अमळनेर / निंब (लोकमन न्यूज प्रतिनिधी : अनिल चौधरी) : 'बाळाचे पाय पाळण्यात दिसतात' या उक्तीची प्रचिती लोकमन न्यूजचे प्रतिनिधी अनिल चौधरी यांना निंब गावात भटकंती करताना नुकतीच आली. जगाच्या पाठीवर अवघ्या ४ वर्षांचा पखवाज वादक निशांत सिंग याची चर्चा होत असते, त्यापाठोपाठ आता निंब गावात अवघ्या ९ वर्षांचा चिमुकला ह.भ.प. केदारेश्वर गोविंदा चौधरी आपल्या उत्कृष्ट पखवाज वादनाने सर्वांना थक्क करत आहे.

पखवाजाचा चिमुकला जादूगार: निंबच्या केदारेश्वरची अद्भुत कहाणी

निंब येथील रहिवासी दिलीप बाबा चौधरी यांचा नातू आणि भाऊसाहेब गोविंदा (सोनू) दिलीप चौधरी यांचा हा कनिष्ठ चिरंजीव आहे. केदारेश्वर सध्या अमळनेर येथील व्ही. एच. पवार इंग्लिश मीडियम स्कूलमध्ये इयत्ता दुसरीत शिक्षण घेत आहे. या चिमुकल्या वयात तो ज्या लीलया पद्धतीने पखवाज वाजवतो, ते पाहून पाहणारे आणि ऐकणारे अगदी मंत्रमुग्ध होऊन जातात. त्याची ही कला पाहून अनेक जण त्याच्या उज्वल भविष्याबद्दल भाकीत करत आहेत.

जगप्रसिद्ध तबलावादक उस्ताद झाकीर हुसेन यांनी वयाच्या १२ व्या वर्षी तबला वादनाला सुरुवात केली आणि पुढे जाऊन जगात मोठे नाव कमावले. या पार्श्वभूमीवर, वयाच्या अवघ्या ९ व्या वर्षी केदारेश्वरचा हा पखवाजावरील जलवा पाहता त्याचे भविष्य किती सुवर्णमय असेल, याची कल्पना येते. विशेष म्हणजे, निंब गावाची माती ही वारकरी संप्रदायाची खाण मानली जाते. या मातीत अनेक नामवंत कीर्तनकार, पखवाज आणि मृदंग वादक तसेच सुंदर गायक घडले आहेत. याच वारकरी परंपरेच्या संस्कारांत वाढणाऱ्या या चिमुकल्या केदारेश्वरचे भविष्यही नक्कीच उज्ज्वल असणार आहे, यात शंका नाही.

वारकरी परंपरेचा मान वाढवणारा बालकलाकार: 'लोकमन न्यूज'चे विशेष आवाहन

लोकमन न्यूजच्या माध्यमातून प्रतिनिधी अनिल चौधरी यांनी केदारेश्वरच्या कुटुंबाला आणि निंबच्या गावकऱ्यांना विशेष आवाहन केले आहे की, त्यांनी या बालकाच्या भविष्याकडे लक्ष द्यावे आणि त्याच्या पाठीशी खंबीरपणे उभे राहावे. योग्य मार्गदर्शन आणि प्रोत्साहन मिळाल्यास एक दिवस आमचा हा केदारेश्वर निंब गावची मान राज्यासह देशभरात उंचावल्याशिवाय राहणार नाही.

या उदयोन्मुख बालकलाकाराच्या प्रतिभेला लोकमन न्यूजच्या वतीने सलाम आणि त्याच्या पुढील वाटचालीस व उज्ज्वल भविष्यासाठी मानाचा आशीर्वाद!