जळगावात कुंदकेश्वर महादेव प्राणप्रतिष्ठा सोहळ्याला भक्तिमय प्रारंभ; ढोल-ताशांच्या गजरात भव्य मिरवणूक!

(प्रतिनिधी, अनिल चौधरी): जळगाव शहरातील छत्रपती कॉलनी, वाघनगर परिसरातील कुंदकेश्वर महादेव मंदिरात तीन दिवसीय प्राणप्रतिष्ठा सोहळ्याचा शुभारंभ मोठ्या उत्साहात झाला आहे. या सोहळ्यामुळे वाघनगर आणि आसपासचा संपूर्ण परिसर भक्तीरसात न्हाऊन निघाला असून, सर्वत्र एक मंगलमय आणि उत्साहाचे वातावरण पाहायला मिळत आहे.

सोहळ्याच्या पहिल्या दिवशी एका खास आणि भव्य मिरवणुकीचे आयोजन करण्यात आले होते. पारंपरिक ढोल-ताशांच्या निनादात निघालेल्या या मिरवणुकीने उपस्थितांचे लक्ष वेधून घेतले. या मिरवणुकीचे एक वैशिष्ट्य म्हणजे, बळीराजावर महादेवाची पिंड ठेवून ती वाजतगाजत नेण्यात आली, ज्यामुळे शेतकऱ्यांप्रती कृतज्ञता आणि महादेवावरील अपार श्रद्धा यांचे सुंदर मिश्रण अनुभवायला मिळाले.

लेझीमचा गजर आणि महिलांचे भक्तिमय स्वागत!

या मिरवणुकीत जिजामाता माध्यमिक विद्यालयाच्या विद्यार्थिनींच्या लेझीम पथकाने आपल्या जोशपूर्ण आणि तालबद्ध सादरीकरणाने उपस्थितांची मने जिंकली. त्यांच्या उत्साही नृत्याने मिरवणुकीत एक वेगळाच उत्साह संचारला. मिरवणूक मार्गावर परिसरातील महिलांनी आपल्या दारात सडा-रांगोळी काढून आणि दिव्यांनी रोषणाई करून मिरवणुकीचे आणि महादेव पिंडीचे भक्तिभावाने स्वागत केले. हे दृश्‍य पाहून सर्वत्र आनंद आणि उत्साहाचे वातावरण निर्माण झाले होते.

या सोहळ्याच्या यशस्वी आयोजनासाठी कुंदकेश्वर महिला मंडळ, छत्रपती कॉलनी,वाघनगर विशेष परिश्रम घेतले आहेत. मंडळाच्या अध्यक्षा स्वाती ओतारी आणि उपाध्यक्ष मनिषा पाटील यांच्या नेतृत्वाखाली, तसेच मंडळाच्या सर्व सदस्यांच्या सहकार्याने पूजनाचे व गायनाचे कार्यक्रम भक्तिमय वातावरणात पार पडले.

सोहळ्याच्या सल्लागार संगीता पाटील यांनी दिलेल्या माहितीनुसार, या तीन दिवसीय सोहळ्याच्या दुसऱ्या दिवशी भजन-कीर्तनाचे कार्यक्रम आयोजित करण्यात आले आहेत, तर रविवारी या सोहळ्याची सांगता भव्य महाप्रसादाने होणार आहे. या निमित्ताने परिसरातील भाविकांना भक्तिमय वातावरणाचा आणि सामाजिक एकजुटीचा अनुभव घेता येणार आहे.