दुर्मिळ 'पोवळा' साप पुन्हा नैसर्गिक अधिवासात; सर्पमित्र किशोर पाटील यांची कामगिरी

जळगाव: शहरातील हरी विठ्ठल नगर भागात एका घरात अत्यंत दुर्मिळ प्रजातीचा आणि विषारी असा 'पोवळा' (Slender Coral Snake) साप आढळून आल्याने खळबळ उडाली होती. संजय मेटकर यांच्या घरात आढळलेल्या या सापाला पाहून सुरुवातीला भीतीचे वातावरण निर्माण झाले होते, मात्र नंतर सर्पमित्रांच्या मदतीने त्याला सुरक्षित बाहेर काढण्यात आले.

साधारण २५-३० सेमी लांबीचा हा साप दिसण्यास आकर्षक असला तरी तो अत्यंत लाजाळू प्रवृत्तीचा आहे. विशेष म्हणजे त्याचे विष थेट मानवी मज्जासंस्थेवर परिणाम करते, त्यामुळे तो धोकादायक मानला जातो. मात्र, सहसा हा साप मानवी वस्तीत येत नाही. या दुर्मीळ सापाला पाहण्यासाठी नागरिकांनी गर्दी केली होती.

१० वर्षांनी पुन्हा दर्शन: जैविक साखळीसाठी महत्त्वाचे

या घटनेचे सर्वात महत्त्वाचे पैलू म्हणजे, तब्बल १० वर्षांनंतर याच भागात 'पोवळा' साप पुन्हा दिसला आहे. यापूर्वी २०१६ मध्ये तो याच परिसरात दिसला होता. दुर्मीळ प्रजातीचा हा साप पुन्हा दिसल्याने सर्पमित्र किशोर पाटील यांनी आनंद व्यक्त केला आहे. त्यांच्या मते, हे जैविक साखळीसाठी अत्यंत सकारात्मक मानले जाते. यावरून परिसरातील पर्यावरणाचे संतुलन अजूनही टिकून असल्याचे दिसून येते.

वनविभागाचे अधिकारी आणि सर्पमित्र यांच्या संयुक्त प्रयत्नाने या दुर्मीळ सापाला सुखरूपपणे पकडण्यात आले. त्यानंतर त्याला त्याच्या नैसर्गिक अधिवासात सुरक्षितपणे सोडून देण्यात आले, ज्यामुळे त्याच्या संरक्षणाची खात्री झाली.

- अनिल चौधरी, प्रतिनिधी, लोकमन न्यूज, निंब